Systirin Dinah varð eisini fødd í USA. Tey áttu eisini beiggja nevndur Andrew. Tíðliga mistu systkini bæði foreldrini.

Teddy Moen hevði sannan eldhuga fyri fótbóltsspælinum. Hann meldaði seg í 1987 sum 22-ára gamal í Norsk Fotballtrenerforening (NFT) – árið eftir, at felagið varð stovnað – meðan hann var fótbóltslesandi við Ítróttaháskúlan í Noreg, har ein av lærarunum var navnframi Egil “Drillo” Olsen.

Sjálvur spældi Teddy fótbólt og var venjari í frítíðini. Teddy flutti til Grenland, har hann gjørdist talentmennari í Telemark Fotballkrets. Hann var ein av yngstu venjarunum í norskum toppfótbólti, tá hann sum 30 ára gamal gjørdist høvuðsvenjari hjá IK Start í fyrru hálvu í 1996, men varð avloystur av Karsten Johannessen miðskeiðis í kappingarárinum og gjørdist síðani hjálparvenjari hjá Odds Ballklubb undir leiðslu av Lars Borgar Waage í 1. deild. Seinnu árini hevur hann eisini verið virkin í venjaraleiklutinum og í mestan mun innan aldursgreinaðan fótbólt á Sørlandet.

Hann byrjaði í einum hálvtíðarstarvi hjá NFF í 1998, men frá 1. januar 2008 starvaðist hann fulla tíð hjá NFF og gjørdist dagligur leiðari. Hann fekk serliga ábyrgdina av Cupfinaleseminaret, har fleiri føroyskir venjarar hava luttikið og ein sannur føroyavinur var hann. Bæði FSF og Venjara Felag Føroya áttu eitt stórt pláss í hjartanum hjá Teddy Moen. Altíð klárur at hjálpa til, fittur, blíður at tosa við, altíð nærverandi og vinaligur.

Teddy Moen ynskti eisini, at NFT skuldi taka ein samfelagsábyrgd. Hann byrjaði eitt samstarv við Mathare Youth Sport Association (MYSA) í Kenya, sum er ein hjálparfelagsskapur í Mathare-fátækrabýlinginum í Nairobi. Har løgdu tey dent á venjaraútbúgving og fekk útgerð til vega fyri at kunna spæla fótbólt. Meðan verkætlanin hevur koyrt, hava tey samlað fleiri enn 10 milliónir inn. Umboðið frá Vågsbygd í Kristiansand, Teddy Moen, fekk í vár tillutað gullmerkið fyri ídna virksemið og 25 árini sum Mr. Trenerforeningen frá Norges Fotballforbund. Norsk Fotballtrenerforening hevði í 1998 okkurt um 1.000, men hevur í dag fleiri enn 3.000 limir.

Í november 2017 fekk Teddy staðfest krabba í tarminum. Hann fekk fleiri skurðviðgerðir og drúgva viðgerð, men 16. mai 2023 orkaði kroppurin ikki meira. Teddy Moen andaðist bara 58 ára gamal. Fólk fara at minnast Teddy Moen fyri sera stórt ídni, inniligt forvitni, blíða og positiva nærveru og hansara fakliga dugnaskap. Hann stríddist fyri, at venjarastarvið varð góðtikið sum eitt veruligt starv og at teir fingu livilig kor. Venjara Felag Føroya ynskir at senda samkenslukvøðu til konuna, Marianne, og børnini Markus og Martine. Ærað veri minnið um føroyavinin Teddy Moen og tøkk til Norsk Fotballtrenerforening fyri allan stuðul!