Spælskiparin sum uppleggjari (2:3)

23. november 2019

Átaksøkir fyri 2. stig – Frá møguleika til veruleika

a) Kunna teg væl um møgulig rúm og viðleikara/r, áðrenn fyrstu nerting

Hygg væl rundan um teg frammanundan. Tú skalt vita hvørjum leikarum, tú skalt hyggja eftir í hvørjum rúmi. Ver klárur, tí at hetta má kunna loysast upp á bara eina nerting.

b) Evnini til at fanga tey røttu teknini og kenna aftur mynstur í spælinum/hvat hendir, og nær

Hvørjar flytingar skal eg gera? Eru okkurt tekin hjá mótstøðuliðnum, sum sigur, at NÚ skulu vit sláa til? Standa teir ov høgt? Er nakar brotin út úr ketuni? Hvørji tekin skulu vit gera okkum dælt av og hvørji skulu vit lata fara aftur við borðinum?

c) Evnini til at stýra bóltinum undir ómetaliga trýstum rúm- og tíðarviðurskiftum

Arbeið fram móti einum breiðum bóltúrvali, sum ger teg føran fyri at standa ímóti trýsti úr øllum ættum. Tað krevur eina góða bóltkoordinatión og grundleggjandi rørslustýring, og nógva venjing í at skerma bóltin, ymiskar bóltførleikavenjingar, temjingar við báðum fótum og øllum pørtum av fótinum, umframt góð evnir til at reka/dribla við bóltinum í trýstum støðum.

d) Stutta fjarstøðu millum bóltin og kroppin; ver klárur til at fanga “rætt rúm til rætta tíð”

Lítil rúm krevja stutta fjarstøðu til bóltin, og tættar nertingar (lítil fet). Tíðin millum 1. og 2. nerting skal vera so stutt sum gjørligt. Syrg fyri, at bólturin altíð er til taks, um so er, at timingin boðar frá, at tað er nú, at man skal sláa til. Justera við millumnertingum um neyðugt.

e) Finn best hóskandi timingina (tíð/rúm í samspæli)

Timingin er avgerandi. Arbeið við støðum, har tú mást velja, nær tú skalt spæla bóltin víðari í mun til flytingarnar, sum koma.

Skrivað: Áki Johansen